熱門文章

2018年9月9日 星期日

聽花CD #10:Tragic Idol


喺日本睇咗咁多idol show idol group,發覺好難撞到比較老嘅組合,唔係年齡做得idol後生幾近必然,講緊團齡:


見字時我睇idol資歷都未夠一年,但唔少睇過嘅組合其實唔係早過我好多開始名乎其實睇住佢哋大,有兩三年歷史已經可以話係資深老前輩。當indie band長夾十幾廿年唔散好平常,indie idol相反有幾年歷史已經叫好命,地下偶像呢家嘢其實會越睇越灰。


Babymetal證明metal idol做得到之餘,成功起嚟唔止日本仲可以紅遍全球加主流地下兩個市場食晒,有日本數一數二最強女主音坐鎮、隊band超強加整體好睇當然係主因,但你唔可以否認冇大公司後台係冇可能有咁非一般嘅音樂同製作級數。不過大公司有利自然有弊,冇可能唔為流行為賺錢而做時點都好重商業計算味,當初要成為全世界最創新而挑戰規範甚至禁忌嘅冒險精神第二隻碟已經冇咗一半,轉而傳落民間遍地開花。


即使Babymetal作為第一隊已經食盡全世界成浸頭水,日本本土仲有好大個indie idol市場夠俾你撈吓水尾,而偶像團多得嚟普遍短命時,為求存就會令你大把創意乜都敢試,而做得alternative本身就係賣怪仲越怪越好時更加如魚得水,好似今次主角Candye♡Syrup。


日本最大優勢係無論做啲嘢幾唔正常幾柒幾戇鳩,都立即會到盡頭全世界都會接受,唔係都唔會出到呢種五條女染到個頭五顏六色、著到Barbie公仔噉上台、初音聲雞仔聲唱trancecore嘅組合出嚟。如果係白人同非日裔亞洲人做,你未聽歌齋見到已經爆粗,但一話嗰班原來日本人嚟,你就會立即覺得好合理好OK喎。


睇過三次,第一次仲要喺band show睇,可想而知佢哋音樂有幾band/metal。2018年頭第一隻碟歌路metalcore為主再乜都溝啲ska punk都有,跳舞同表演又撈metal/core嘢band show嘢,有首一breakdown台下班仔就會做掌上壓砌條人肉橋,然後個肥妹落台一面嘔泥一面踩住佢哋過橋。即使音樂未至於好高質素,佢哋嘅live絕對夠過癮夠好睇。


隔幾個月再出隻EP當堂唔同晒,三首歌有首話係台灣人寫,派台兩首一首好Passcode另一首好deathcore主流地下兩味齊晒,音樂同製作進步唔少仲有得去美國表演。諗住捱出頭上位喇,點知出完碟無耐就話解散,八月中一週年紀念演出就係告別演唱會表演完即時全體畢業,九月頭去埋美國Candye♡Syrup第一期正式結束。


望落形勢大好都可以話停就停,導火線可能係其中一個center走咗,但影響係咪真係咁大?類似個案Alloy同樣多show得嚟出完碟冇耐主將離團,我仲好好彩佢走一個月前睇到live同佢影到相,佢畢業嗰晚Alloy隨即結束,但公司揾多三條新女改組成Will-O',賣相音樂表演都轉型成功,而家好似仲多show出過Alloy時期。


照計少咗個主力,就算未搵到人代都夠做住先,最後一次睇已經係四人上陣,點解直頭散埋得佢哋知,因為台前幕後由始至終冇解過話,無聲無息就消失好似冇點存在過。除咗唔止嘔泥仲最唱得個肥妹入咗高橋聖子彈結他隊HöLDERLINS(而家應該叫高橋聖子之前隊band,呢個係另一個故事),另外幾個點、會唔會繼續做偶像做音樂第時至知,因為大家沉默到好似預咗件事遲早會發生。


但做咗咁耐偶像,係咪可以簡簡單單話唔做就唔做變返普通人呢?始終地下明星都係明星,只要你接受到每次演出要同大量毒撚近距離交流,呢個世界冇幾可即使你姿色未夠,都可以只賣藝唔賣身仍然而有大量異性貼錢圍埋嚟做兵,經常有fans送嘢俾你仲送到跪晒地,生日祭更加捧到你上天收花收禮物收到手軟,如果做得有聲有色仲有機會俾人請你去外國tour。呢份超然夾indie band夾到好大都未必俾到你。


最大分別係做idol等同一門事業,而且讀(初)中學已經開始,過程好可能會犧牲讀書嘅時間同機會,而唔係好出名或者大公司旗下廿歲頭就好大機會要畢業,當偶像賣青春而後浪來之不盡時點解一定要你?唔係好多個可以好似2&十六歲開始做地下偶像,做到單飛做咗六年仍然可以維持高人氣甚至越做越大,當然單飛成本低可能係主因。


所以Candye♡Syrup一週年大日子反而變成解散紀念日係非常唏噓,但未必完全係壞事,起碼最後一擊係美國tour比好多人走得風光,而且如果係做咗成年計數發現個project做落去大家都唔夠搵食,借有人走順便斬纜或者更好。當全隊可以解散得咁平靜,呢個理由唔係完全冇可能。


雖然Babymetal超乎所有人想像嘅成功一定對indie idol發展帶嚟好大助力,呢股熱潮唔會係近幾年至開始爆發,但睇過嘅組合好多只得一至兩年歷史,就代表Candye♡Syrup只係無數過眼雲煙之一。以佢哋為鑑,想追indie idol的話有機會睇同搵囡囡影相一定要去咗先,因為星途咁唔穩定時機會好可能只得一次。


所以話睇indie idol可以仲灰過睇indie band,今日你至睇完佢哋開開心心上台表演得好興奮,聽日已經粒聲唔出唔見咗人,可以全無先兆隨時結束,相信有時佢哋都身不由己。

2018年8月11日 星期六

聽花CD #9:HAMIDASYSTEM


[劉Sir啲文一向出名唔知寫乜又鬼咁長,如果話今次睇完有禮物送,唔知會唔會多啲人睇(晒)呢]


睇過咁多idol有幾隊想特別寫吓,HAMIDASYSTEM最想寫先,因為夠怪,唔係擺明要同主流相反走另一極端種「反idol」,而係外型造型音樂叫正路,但加埋又唔似一般idol,仲冇乜其他組合似佢哋。


其實本來好大路,叫自己做melodic electronica不過出道啲歌都係典型idol pop,同套白色衫一樣冇乜特色。但係出咗第一隻EP隔個月首新single立即唔同晒樣,歌路變咗trip-hop、downtempo、trance溝埋,唔多開心位upbeat位、啱用嚟聽多過睇嘅低調電子音樂,做到名乎其實嘅melodic electronica。


全個轉變超級大,冇乜偶像組合會全部歌咁低調,而且寫新歌個班底好勁編曲變化多而大又多特點,單單《抜けない根無し草》個theme走15/8,仲有二重唱(其實佢哋好多歌都有),歌已經另類過人。


造型轉埋全黑、跳舞由開心舞變到好似做舞台劇,觀眾想揾個位跳吓fing吓、跟住做動作或者自己玩毒撚嘢都好難,每次佢哋上台台下一定企定定靜靜睇。當日本idol show出名觀眾夠癲好多時台下仲好睇過台上,HAMIDASYSTEM係難得表演時場內會好平和嘅組合。


出碟前後咁短時間內音樂同表演風格改變咁大,係一早就計劃走alternative idol路線,只為推佢哋出咗道儲人氣先就用堆pop歌頂住先?定出完道至覺得pop落去唔多掂,就拿拿臨搵咗而家啲另類歌務求盡快轉型?雖然睇埋佢哋個名似前者,見完四條女我硬係覺得後者至係真。


事務所搞偶像組合最重要全隊夠多元化食到越多唔同客路越好,HAMIDASYSTEM就係長髮高矮各一加短髮高矮各一乜仔都殺晒嘅百搭組合,只係見到有兩個細細粒個樣咁幼齒,但著到全身黑面燶燶去演灰灰哋邪邪哋嘅歌同舞,同全隊除咗黑直長有點邪feel另外三個點睇都乖得滯好唔夾,你唔係同我講你一開始已經打算做到咁alternative時又會揾咁大路嘅囡囡組團吖嘛?(是但啦,佢哋不知幾受歡迎特別個短髮高妹,連鬼佬睇完都揾佢影相㗎)(其實我都係㗎,但係,口烏口烏)


我第一次睇都唔算好鍾意,同睇多幾次就見到幾個問題:音樂喺idol表演入面太另類同低調,現場表演又單向氣氛炒唔起;全隊得黑直長把聲重鼻音而特別同有啲唱功,另外三個都係典型女仔聲唱歌亦唔算好得只夠交貨;而且話就話有兩隻EP,因為唔會再玩第一隻啲pop底歌,基本上每場都係相同幾首歌撈亂玩。


所以初初睇未必受,睇多幾次又會嫌表演唔夠變化,好在我對音樂性有所執著,同佢哋live概念性好重加比一般跳舞組合多一份藝術性,而且製作好認真,有啲位會玩熄燈同只見過佢哋自備laser出show,未見過有邊隊indie band/idol玩細livehouse會擺咁多心機喺燈光方面。


對我嚟講無論聽定睇都要慢慢浸,浸耐咗就會覺得有味道,好多人話聽日本囡囡電子梗係聽Perfume,但從來唔識欣賞時HAMIDASYSTEM啱我多啲。但亦好明白呢條路線會做到一係好受好鍾意一係就唔鍾意只覺得悶冇中間位,但想點就點只賣知音唔係就係alternative態度咩?


不過佢哋都唔使憂,之前講過越睇得多idol越多嘢唔明,好似四條女都OK但成個package點睇都唔似紅得起,偏偏做到好大差唔多場場都出最後或者最後幾隊加勁多fans。今次嚟又好彩撞到出第二隻EP《DERO X》,其實只係將之前六隻single加live出場段intro夾埋一隻碟,逐隻single追一隻一千円,而家三份一價錢買晒轉歌路之後全部歌慳返唔少。而indie組合每次出碟,某程度上係借將當時所有歌出隻精選為嗰個時期做個總結,跟住就會進入下一期音樂同造型都有改變,而呢樣我就最擔心。


佢哋新活動係隔一排就去cafe做一日店長,而家套新衫都有點女僕/女傭風,唔知邊樣係雞邊樣係蛋,但換衫我一定唔開心,之前套黑暗風夾歌路之餘亦係我最鍾意嘅idol服裝。


轉女傭look亦可能象徵音樂唔再灰,最近一次睇兩首新歌中間加返光明位開心位,音樂pop返啲但表演更重戲劇性,發展落去可能音樂未必咁鍾意但live會覺得好睇咗。不過實際會係點就我都唔會知啦,因為下次可以再睇佢哋起碼係一年之後,到時可能女傭風呢期都完咗又轉另一樣嘢啦。


所以而家就進入大家最期待嘅送禮環節。睇佢哋嗰場係五點開演十四隊嘅fest級盛事,唔計真正嘅fest睇過咁多idol show呢場一定最多人,HAMIDASYSTEM好鬼多fans而賣嘢個位好鬼細見到超墟冚已經出返去,到睇埋仮面女子後半場加神使轟く、激情の如く。全set終於埋到counter。見有可能最後一次睇佢哋,買完碟俾多一千円買多兩張影相券,排咗差唔多半個鐘錯過埋じゅじゅ成場,排到第四個至話夠鐘收檔截龍,問噉點算呀佢話唔使怕張券兩個月內有效。但係我下星期走喇喎。


但買得無謂嘥,如果你呢兩個月去日本,我可以送呢兩張影相券俾你同佢哋影相,買嗰日係25/7即係去到九月底都用得,去睇HAMIDASYSTEM全日本任何一場show都用得,兩張券可以同兩條女每人影一張即影即有加傾半分鐘偈,或者同一條女影相送簽名加傾一分鐘偈,豪多1000円加多兩張券條女會幫你張相畫埋公仔寫多幾隻字添。


當今年十月冇Loud Park但九月有Sons of Apollo + BAND-MAID + The Crown + Origin + Power Trip嘅自製Loud Park Lite,本來我都想九月飛多轉順便用埋佢,點知呢晚睇完佢哋返到香港就有新工返告別freelance歲月冇得再飛。係幾灰,蝕咗1000円事少,除咗冇得同個高妹影相(可惜已經唔再著最型嗰套黑衫),仲有其實好多indie idol group都唔長命,當返返full-time代表第時可能一年至有得飛一次時,下次再嚟日本佢哋仲喺唔喺度冇人話得埋。呢樣就係下一次想寫嘅主題。


HAMIDASYSTEM OFFICIAL WEBSITE

http://hamidasystem.jp


HAMIDASYSTEM@Twitter

http://twitter.com/hamidasystem

2018年3月22日 星期四

聽花CD #8:Unto the Dawn《Apocalyptic Reflection》


其實之前已經想寫Unto the Dawn,不過唔係因為音樂而為另一樣嘢,但成日唔喺香港又要錄《Metal成熟時》Synergy又出碟一直拖住,到近排好多人仲要前輩級人馬提起呢隻碟,而你知道一隊後生新band可以得到咁多老前輩留意加一面倒讚好係好難嘅事,搞到寫完Synergy《LAIKA》立即開始寫《Apocalyptic Reflection》,襯飛之前寫埋佢,順便沾沾老前輩嘅光扮扮老屎忽先。


我好少會寫metalcore,《Metal成熟時》都講過metalcore只係九十年代尾美國玩爛nu-metal之後要搵下一個潮流,覺得北歐melodic death同Meshuggah啱使但係唔夠勁去玩,就簡化技術同編曲再將neo-classical變成hardcore,就形成直到而家仲未退晒潮嘅美國版melodic death metal aka metalcore。


metalcore對我嚟講最大問題係現場向得滯。我成日覺得'90 thrash係將'80 thrash玩慢一倍,而metalcore再將'90 thrash再玩慢一倍(再跟住嘅deathcore我唔敢提添喇), 玩嘅易上手過extreme metal/melodic death、睇嘅聽嘅就算完全唔識啲歌喺現場都好易跟,一時間breakdown當道搞到睇metal gig好似去咗rave party。喺現場大家一齊high吓可以,但係你叫我喺屋企聽disco歌我就唔多頂得順。


加上作為一個歐派迷兼技術迷同時從來唔多受hardcore,雖然而家嘅北歐已經俾metalcore逆侵略搞到新舊melodic death band都變晒質,始終仲叫保存到當初令美國借鏡佢哋嘅內涵,有得選擇時點解唔直接聽返melodic death metal?甚至單單聽Meshuggah 1995年《Destroy Erase Improve》一隻碟,得著已經多過晒一年入面聽過嘅全部metalcore碟夾埋。


但係都有metalcore我鍾意,因為由melodic death演變出嚟,初期未去到好紅時啲band仲會鑽研melodeath式技術編曲而唔係breakdown走天下,好多而家pop到想喊嘅band,其實早期啲碟都有值得聽嘅地方。仲有一個謎之流派melodic hardcore。


metal一向耐唔耐就會出現一啲玄玄哋嘅分支,好似乜嘢係melodic metalcore呀?「啲riff靚啲囉」、「多啲清聲位囉」、「好多melodic lead墊底囉」,似層層但又好似其實隊隊都係噉玩法喎,你問係咪真係存在我都答唔到你。但事實的確係通常自稱或者俾人叫melodic metalcore嘅metalcore band我又的確比較受。


Unto the Dawn有好多樣嘢令我一聽就鍾意,其中一樣係令我諗起Killswitch Engage。唔係好多隊metalcore band我會鍾意,要數嘅KE一定有份,除咗唱得勁音樂仲幾重melodic death味道,屬於唔身在現場喺屋企對住對喇叭都會覺得有嘢聽唔會悶種metalcore。


而且音樂真係有料到,第一首《Before Everything Dies》作曲編曲技術氣勢「嘩」出嚟,應該係第一次有香港metalcore碟俾到呢份感覺我,就連Shepherds the Weak早幾個月出嘅高峰作《Biformity》都唔得。雖然仍然好多令我唔太鍾意metalcore嘅00000位,但技術唔錯riff夠紮實,加上作曲編曲功力的確好高,而且歌佬兩把聲都唔錯,我唔止唔會好似平時聽metalcore一到某啲位就唔耐煩,就連《Lucifer Effect》呢種好重hardcore味、平時我唔多會鍾意嘅歌,都可以聽得幾投入幾享受。


雖然第一首歌一開頭好爆,其實全碟整體唔係好恆,呢樣我本來都有啲擔心,因為講過呢一派易上腦易入耳之處就係將本身好激嘅嘢玩慢啲所以易跟,代價就係好多歌甚至碟都係只爆個頭吸引你跟住就靜晒慢晒搞到頭重腳輕。之前講過一個例子Betraying the Martyrs《Phantom》,明明隻碟頭半分鐘係個世界級開場,只要跟住直衝埋落去衝到隻碟最尾就可以去到年度大碟級數,點知半分鐘一過立即dup停慢慢磨,跟住就唔使再提喇(不過我仲係超鍾意隻碟入面首《Let It Go》cover架)。


計晒全碟真係稱得上衝,只得《Before Everything Dies》同《As Blood Turns Violet》兩首個頭,但作曲編曲好強,《As Blood Turns Violet》典型式爆炸性開頭再逐漸變輕轉慢,但四分半鐘入面一直有豐富變化,兩把聲唱得好同時夾得好氣氛一流,已經唔會再計較夠唔夠恆。呢首歌唔止係全碟最佳,仲應該算得上係香港metalcore代表作之一。


但前半做到個勢咁勁,反效果係搞到好似擺後半啲廣東歌唔夠英文歌勁。《逆容》的確唔係好出色,除咗手法同前面做過嘅一樣但精華已經喺之前三首發揮晒,仲要放喺《As Blood Turns Violet》後面,算係一個低潮位。


埋尾嘅《末日》係性質唔同嘅慢歌,所以有不足都未至於被過度比較,獨立聽亦唔差,只係就算我好希望香港band唱廣東話,總結係Unto the Dawn唱英文會較得心應手,除咗廣東詞有啲位填得唔太啱音,仲有清聲聲底其實有點老牛,唱英文唔會覺得有咩問題,但一唱廣東話間中硬係有啲怪唔太順耳。有時聲線、口音同咬字的確需要有一定程度配合,先可以將一種語言唱出理想嘅效果。


音樂絕對上乘,但我諗更多人聽完隻碟會講嘅係製作。香港錄完再送去外國做mixing/mastering開始普遍,而Unto the Dawn搵嘅All4band本身就係一個幫開呢類現代新派metal樂隊做後期製作嘅專業團隊,經外國音響工程師執完的確有極大分別,唔止整體好厚好實,鼓聲份音色同質感香港始終做唔到,仲有一份只有外國碟至搵得到嘅光鮮感(或者話好似有點點迴音嘅「K房聲」效果)。


我唔知大家都係香港錄音,唔同band做後製之前個master音色同音質分別有幾大,但即使而家香港人自己做mixing/mastering成品可以好清好靚,都硬係爭噉呢份「K房聲」嘅有機感搞到真實感差啲,尤其鼓聲硬係做唔出同一份質感同迫力。


因為兩者類型加推出時間都接近,好難唔將《Apocalyptic Reflection》同Shepherds the Weak隻《Biformity》攞嚟比較,但實際上又唔太比較得到:《Biformity》搵菲律賓studio做後期製作,當佢哋音樂上一早慢慢偏thrash帶點復古味,隻碟都整到音色粗糙偏舊派,具臨場感之餘好夾隻碟歌路,係個非常成功嘅例子。


Unto the Dawn始終維持現代metalcore路線,《Apocalyptic Reflection》錄音製作同樣非常配合自己音樂,而香港有潛質達到相同製作質素嘅係Qollision,佢哋都係搵外國工程師做mixing/mastering,三隻碟製作質素慢慢提昇,而整體尤其個鼓冇咁強修飾感。


《Apocalyptic Reflection》技術、創作同製作上,已經去到攞去外國都唔會失禮嘅級數,但呢隻香港史上其中一隻最佳metalcore碟理應平地一聲雷,而家出咗反而冇乜迴響,唔止雷聲雨點都冇。而呢樣就係最初我想寫呢隊band呢隻碟嘅嘢。


就算音樂水準已經去到咁高水平,都未至於立即仆到去寫,因為對我嚟講音樂「都係嗰啲」,畢竟metalcore本身限制就好大要有突破唔容易,所以好多時只有靠質素取勝,但係你選著metalcore呢個行頭已經失去優勢,因為作為(曾經)當打類型,全世界任何地方一早有多到數唔清嘅同類樂隊,就算你玩得勁寫歌掂製作好,去到世界層面對好多人嚟講只會係「都係嗰啲」。


再用出完《Necroracle》冇做過宣傳,都可以俾好多外國網選隻碟做2016年度大碟嘅Karmacipher做例子,佢哋可以咁成功唔止因為寫歌技術確實超強,仲有dissonant death metal一直限於小眾,所以當你整到一隻咁有料嘅碟出嚟,即使唔主動同人講,只要有人知道聽過就自然會幫你推廣出去仲要傳得好快。


呢樣就係行頭問題。而你揀咗一個一離開自己地方出到外面立即冇晒主要優勢嘅類型,有時單靠質素都未必可以有一番作為,而且metalcore一早過咗最高潮更加未必仲有咁多人肯理你,呢種環境要把握得到成功機會,首先最少要引到人聽你隻碟,亦即係要宣傳,甚至賣廣告。例如Instagram廣告。


如果有留意近兩個月搞band搞show嘅人討論,都會知獨立樂隊而家喺facebook越來越難宣傳,因為你分享facebook以外嘅網站,facebook會降低你個post嘅曝光率,即係有人寫咗篇碟評讚到你隻碟上天,但你喺facebook share完可能一個人都睇唔到,因為俾facebook hide咗唔出現喺其他人嘅wall度。想有人睇到咪俾錢賣廣告囉,但係咪真係有用呢,我只有話咁多年嚟我冇幾多次喺facebook見過band/rock/metal廣告,見到會有興趣開嚟睇嘅更少。


但喺Instagram反而見過《Apocalyptic Reflection》唔止一次,亦因為Instagram見到我至知原來香港有一隊band叫Unto the Dawn、先知佢哋出咗隻碟叫《Apocalyptic Reflection》,跟住至去搵嚟聽,先知原來音樂咁正。如果單靠facebook,我都要等到班老前輩講起呢隻碟,仲要facebook唔會hide佢哋啲post,至會知道呢隊band呢隻碟嘅存在。所以而家你想宣傳自己新碟又打算使少少錢做宣傳,不妨試吓去Instagram買個廣告位,分分鐘比靠facebook幫到你更多。


又或者,早排睇完show同band吹水傾開出碟呢個話題,大家至講笑話不如自己放埋seed囉。雖然直到而家好多西方人仲對亞洲band感到新奇好有興趣,你單單擺隻碟上Bandcamp已經多好多外國人知道你隊band聽你嘅音樂,但你唔可以否認其實最有效嘅宣傳方法係放seed,你覺得BT嘅人多定上Bandcamp嘅人多?


而家一出碟就全隻放上Youtube同Bandcamp俾人試聽已經成為樂隊間慣例,只要你擺得上去就好大機會俾人rip落嚟放上網seed,你睇吓而家上Google search band名碟名,成日頭幾個出嘅唔係隊band自己或者同佢哋有關嘅網站,而係邊度有seed download隻碟就知。而且經常你今日擺咗隻碟上網,聽日已經有人放seed,反正對佢哋嚟講唔使錢,唔知咩嚟好唔好聽唔緊要,攞咗落嚟益咗街坊至算啦。


所以個笑話就係,既然係噉,不如直頭我seed埋俾你啦,比齋放Bandcamp Youtube更加大機會令你會開我隻碟嚟聽,反正目的都係搏你試聽之後捨得俾錢買隻physical、會介紹你隊band俾其他人同睇你嘅live嗟,點解唔直接用性質相近但成效更大嘅方法?


而且(又可能呢個先係重點)當而家啲人已經雜到總之你有出歌出碟而俾佢搵得到,就乜狗屎垃圾都可以變成seed,如果你出完碟反而冇人放seed,咪即係你隻碟連狗屎垃圾都不如?梗係幾大都自seed先啦,唔係連免費都冇人肯幫你隻碟放seed咪好樣衰?


Unto the Dawn@facebook

http://www.facebook.com/untothedawn


Unto the Dawn@Bandcamp

http://untothedawn.bandcamp.com

2018年3月15日 星期四

聽花CD #7:Synergy《LAIKA》


香港metal band最大問題唔係唔夠技術,而係唔夠風格,由某幾隊band開始聽起夾起而似佢哋好正常,但發展一段時間之後仍然只追求更加似當初令自己聽歌夾band嗰隊嗰類,而唔係嘗試唔同嘅嘢開拓自己嘅路,喺香港band之間好普遍。呢一套十幾年前觀塘Livehouse雜錦show時代仲行得通,因為嗰陣香港metal band好少,練得勁玩得好嘅更少,就算音樂唔點特別,基本上你有返咁上下功力企得到上台已經有人睇你撐你。


但呢個時代唔止本地band數量多咗,要睇外國band無論網上定現場都易得多,當大家玩嘅做嘅一樣,自己地方競爭已經夠大,計埋外地的話都未使講日韓更加唔使講西方,單台灣同大陸已經大把band贏你幾條街,有時仍然會支持真係只因為「本地人撐本地band」呢個主場優勢。


呢樣我相信夾開band嘅人唔會唔明,只不過集中練一樣嘢點都容易過創造新音樂,因為就算技術台風未到好頂級,只要有一定級數都夠喺自己地方撈落去,但要造一樣新嘢唔止難仲要更多時間精神甚至更高技術,做到出嚟唔掂嘅仲會俾人笑踩多幾腳,點解要攞苦嚟辛?香港地夾band己經咁難出show嘅機會已經咁少,梗係越穩陣越好啦。當呢個成為香港(metal) band大風氣,我會更加欣賞樂隊敢去創新、敢去玩冇乜其他香港band試嘅歌路,而每講到呢個題目,有三隊band我一定樂此不疲猛咁提。


Dandelion Mound仍然係我心目中近代香港metal band之中最大遺憾,好難得香港有人玩metalgaze/blackgaze,歌寫得好而且夠出最少一隻EP,不過唔知人事方面係咪有問題,每次睇live班底都好似有啲唔同,好處係搵得啱人對音樂發展有幫助,最後就正式成為blackgaze(雖然個歌佬好多時唱得太core),但陣容唔穩定亦對每場表演方式同現場水準有影響,後期嘅live的確唔算玩得好好,最後更加未出到碟就散埋。雖然Topsy-Wave差唔多同一班人,兩隊歌路同表演分別都幾大,Dandelion Mound種音樂同感覺喺香港真係冇另一隊band代替得到。所以出唔到碟真係好可惜。


而djent開始嘅新metal band比以前更追求技術,歌曲整體同現場感染力唔及之前幾代係事實,但我唔太追新派都好鍾意Black Night Red Sky。progressive deathcore本地罕有之餘唔係整幾個breakdown等live有得俾人high就算,而將重點擺返落寫歌,有衝位有chok位有飄位編曲又有條理,技術同創作上好多都係同期香港band之中未見過,真正達到progressive創出新方向呢重意義。國際學校學生同喺外國文化圈子入面生活嘅band友諗法同做法向來唔同本地人,令佢哋成為一隊好特別嘅香港band,live又玩得好非常有feel,可惜呢頭話隻EP搞掂咁滯就出得,嗰頭就話隊band冇咗,又係香港metal一大損失。


所以最後一隊Synergy我曾幾何時都擔心過會唔會步另外兩隊後塵,因為大家同樣走自我創新路線,但佢哋最難sell:Dandelion Mound手blackgaze出得metal gig又出得文青show,Black Night Red Sky有大班core系觀眾支持新派metal fans又鍾意,如果呢兩隊都做唔住,歌路同客路更加窄嘅Synergy照計幾難捱落去。點知最後得佢哋出到碟。其實我有少少爆冷feel。


後生嘅未必知,Synergy其實算香港metal界all-star project,成班佬都係夾過十幾年幾隊band仲要好多係勁band(如果你聽香港death metal但係未睇過Hermetic Silence,你已經錯過咗好多),而嗰啲band就係我十幾年前啱啱開始聽metal第一批接觸嘅香港metal band,跟住大家夾埋成為Synergy,由第一場live到嚟緊第一隻碟release party,喺香港出過嘅show可能只得Incoming Take Cover呢場cover show冇睇到。Synergy應該係我呢世人追得最貼香港band,名乎其實細細個已佢哋聽佢哋班人啲嘢睇住佢哋大。講完都覺得自己好老。


但我非常樂於呢(十)幾年噉樣睇住佢哋,睇咗十幾年玩得好嘅香港metal band好多,但掂得嚟有格嘅非常少,所以每有一隊可以令你覺得好唔香港band甚至唔完全似聽開嘅外國band實會特別留意。因為夾Synergy之前啲band歌路已經有death有nu有progressive好雜,五湖四海夾埋Synergy歌路就係你都唔多捉到路,第一次睇live聽《In Your Eyes》反應係「嘩乜咁Carcass嘅」,然後第一次聽《The Dromos Home》,「嘩乜咁Opeth嘅。」呢兩隊都係你聽香港band時極少機會聯想得到,香港亦冇人玩progressive death metal咁滯,最接近我只知道2003年審判日有隊Phantasmagoria,當時上台好似只玩咗一首歌,就係將Opeth全長二十分鐘嘅《Black Rose Immortal》cover晒,不過跟住唔知去向。會玩Opeth式prog-death同時有原創作品公開嘅香港band,Synergy應該係第一隊。


亦因為追咗咁多年至會明白有幾難sell,其實睇佢哋出live台下反應就知。而家代人聽core嘢同死衝嘢大,唔識首歌唔緊要你有個beat或者breakdown俾我live跟住玩就得,同覺得隊band個個人都係彈/打solo當riff至算technical/progressive,而唔係舊時用編曲做氣氛種手法。當冇咩特登寫俾觀眾現場玩嘅位,仲要差唔多首首歌都兩個字長每隔一陣就變一變,唔係事前已經聽過甚至聽得幾熟吓,身處現場的確唔係咁容易投入得到。好多人聽Synergy第一個回應都係「好Opeth」,呢份絕對係美譽,只不過Opeth屬於必聽個年代已經係十年前,當而家班後生會問返你「邊隊係Opeth」或者「唔係啩你仲聽Opeth」,「好Opeth」有時唔完全係好事。加上隊band已經少出show,亦唔多歌擺上網俾大家入場前溫定書,整體唔太利於推銷自己。有時有態度有原則係需要付出嘅。


而且其實已經冇咁Opeth架喇,早期啲歌較接近melodic death時期Carcass,2013年隻demo左右《Dromos Home》同《The First Filth》先開始大變,前者舊時個版本仲要更Opeth,中段唱一句就急停嗰吓放慢之餘結他全清聲,同後段入男聲bridge之前有一吓好progressive rock嘅清聲chord,就連唱法都好初期Opeth/瑞典death metal式用聲咬字較清有時甚至少少black,都係令人一聽就覺得Synergy「好Opeth」嘅特色。不過唔知係咪嫌造作得滯或者唔想太Opeth,最後版本幾個位都改到冇咁prog rock,唱亦集中典型death式沉聲,對於好鍾意舊版嘅我嚟講係有啲失望,樂器同演唱音色上對比大會更有效帶出首歌氣氛。


但呢個轉變令而家嘅Synergy搵到一條自己嘅歌路,「好Opeth」只係一個引子,其他歌聽真就會聽得出獨特之處,亦唔會令你覺得「咪又係邊隊外國band」。《The First Filth》、《迴》同《Dromos Home》一樣屬於「Opeth系」,要搵Synergy入門歌三揀一就得,只揀一首正路一定係《Dromos Home》,不過我更想推《迴》,除咗編曲同氣氛唔同另外兩首有自己風格,仲唱廣東話加有男女聲,創作同技術原素方面最多元代。


最直接嘅《優越論》係另一邊「Carcass系」,快板為主加唯一一首短歌(以Synergy標準寫首歌閒閒哋接近兩個字長,四分鐘叫好短架喇),第一次睇反應就係現場觀眾終於有個位唔會咁悶喇,目前亦只得呢一首現場向曲目。如果有睇佢哋早期live或者會記得《In Your Eyes》,係第一首正式公佈作品風格亦接近《優越論》,不過屬於最早期創作唔及而家咁成熟,好似後半個melodic solo outro唔太夾前面個feel之餘似應該擺喺BlackWine嘅歌而唔係呢度,當有相似同時更完整嘅《優越論》,《In Your Eyes》的確唔算好必要。但《LAIKA》作為樂隊一個時期嘅總結,就算搵唔到適合位置擺呢首歌,對我嚟講《In Your Eyes》最能代表變到「好Opeth」之前嘅Synergy,當bonus track送俾大家見識吓隊band初期係點都好吖,一隻CD夠位放架。(其實將兩首demo remaster完再塞埋入隻CD都仲夠位架,到時就真係變成階段性總結嘅Synergy全集喇)


中間四首咁高質素,我反而覺得缺憾在全碟開頭。一隻碟最重要開場做得到聲勢奪人,所以選曲一係夠恆一係最搶耳,而《夢道》個頭同《LAIKA》序曲連貫之餘氣勢的確好有開場格,但聽到後半有點後勁不繼,搵唔到「Opeth系」大反差編曲特色時更似一首加長版《優越論》,偏偏《優越論》優越之處就係唔賣編曲賣力度而濃縮成四分鐘炸晒佢,《夢道》長差唔多一倍但編曲集中death metal技術同節奏上變化,要寫得長同時維持到高音樂性絕對唔容易。當後面一連幾首每首都咁有特色,《LAIKA》最平淡反而係開場。


《Sodom and Gomorrah》放最後正路,通常實驗性最高、最玩氣氛或者全碟最爆嘅歌最啱用嚟埋尾,而呢個九分鐘長實驗幾蝦人聽,一來前面啲歌本身已經唔叫易聽相當花精神,最後一首仲要再玩長啲實驗啲,係挑戰緊聽眾精力同集中力。當然作曲編曲做得好可以救返,只係寫長歌最難一向係後面點樣可以冇突破都最少足以維持落去,而首歌最吸引係個頭但敗也在個頭開得太大。你一聽到唔知算印度定中東個intro,聽完頭六首個心點散都會醒一醒,因為一聽到個intro就會諗「咦嚟緊有新嘢喎」,跟住波動亦夠大,只不過嗰份異域氣氛只係最頭同後面整一整點綴一下,intro帶俾你「有新嘢」個想像空間好似一直都填補唔到。


當主題係史詩級聖經災難故事仲要做壓軸加埋呢個intro,我就預期會炸到天火焚城好撚勁噉撚樣,點知前半炸晒後面有點虛,就好似啲天火硬係出唔到,有點覺得俾人昆咗。不過當《LAIKA》係總結隻碟之前嘅Synergy,而《Sodom and Gomorrah》係一個未來新歌方向嘅新嘗試的話,我對新歌又會有啲期待,因為首歌做唔足一回事的確做到前面咁多首(舊)歌未試過嘅嘢,Carcass完Opeth完之後睇吓可以再搵到乜嘢新玩法。我會希望唱方面可以實驗多啲。


其實我覺得拆聲方面demo時期以至《In Your Eyes》都比正式錄碟時變化更豐富,而家有時唱腔聲調偏向單一,有啲位用返高音啲black返啲聲底唱會更惡。而且本身已經有把高識別性男聲時,男女聲理應有更大發揮空間,當然有啲嘢太多就濫,好似全隻碟每當有男聲出現就寧舍搶耳,因為做到一份好似專誠搵人featuring唱嘅效果而突出,只不過當本身就唱得之餘Synergy音樂就係多元,呢方面好值得發展一下。例如,如果《Dromos Home》頭幾句拆聲用偏black腔方式唱(其實demo版就係噉),甚至男女聲每人輪流唱幾句,氣氛已經好唔同甚至更強烈。


另一樣當然係唱多啲廣東詞啦,始終冇成員英文特別好時,英文詞好難寫得靚更難冇錯,正如兩首舊歌英文詞其實有相當多文法錯誤,如果唔係隻碟兼作一個總結而盡量保留歷史痕跡,我係成員的話一定提議呢兩首不如重新填過詞啦。如果全部唱中文咪乜都唔使怕囉~加上呢個時代廣東話文化比以往更重要,堅持唱廣東話更加有意思有價值。


而出下一隻碟時,希望錄音方面會再有突破。呢兩年香港metal band出品帶出完全Made in Hong Kong嘅製作質素唔會差得過外國同級樂隊,雖然仍然有一份近代metal碟普遍嘅電子修飾味,但相信好難避免,因為有好多嘢你唔係租專業studio要喺自己band房錄就一定有限制,單單鼓聲份質感同空間感已經好大分別。《LAIKA》有嘗試模擬返份真實感,但都好難完全洗甩份電子味,不過成品已經好靚聲架喇,你估我唔希望可以錄到《My Arms Your Hearse》咁勁咩,香港又土地問題又成本問題又唔夠呢方面器材人才,做得到先得架。當近兩年香港自家錄音製作質素大有進步,現時環境許可下做得到呢個水準時,相信下隻碟唔會係短期內嘅事,到時本地錄音製作應該又會再進最少一步,到時啲聲可以更具臨場真實感就好喇。


不過個包裝就唔好再咁玩嘢喇。近幾年香港改變嘅唔止錄音技術,仲有大家出碟除咗鬥音樂仲有鬥花巧,想搵隊band出碟正正經經用普通CD盒仲難搵過出digipak出boxset,而《LAIKA》係繼雞蛋蒸肉餅個蒸籠之後再一個華而不實顛峰,打開隻碟會升起呢吓係好特別,但係個盒冇位食實隻CD,每次打開甚至拎起個紙盒隻CD會跌出嚟嘅機率係50%。


相信我係全香港第一個拎到隻實體碟嘅人,只不過早入手半個月即係隻碟會跌多半個月,當你18/3去到release party買碟時我應該會同你一齊買返隻,因為到時隻CD已經跌到爛Q咗,呢個digipak可以令我開多個專欄叫「跌花CD」。唔買多隻CD咪買黑膠囉,雖然佢哋唔係第一隊計劃出黑膠嘅香港metal band,不過出膠其實好多問題要克服,Synergy應該係Hyponic之後第一隊成功出到膠,仲要雙透明黑膠相當型,如果連黑膠都做到打開個盒隻碟會自動升起就型到爆(到時可能個盒仲貴過隻膠)。


雖然我好鍾意《LAIKA》,Synergy亦一定係香港metal史上獨一無二,好遺憾亦好老實亦好諷刺,我唔覺得隻碟喺香港呢個自己地方可以點樣幫到Synergy,因為眾所周知而家香港而家班觀眾聽眾喺core年代聽開長大,當代progressive亦已經同舊時唔一樣,要佢哋肯認真聽返尤其睇返上一代嘅progressive/death絕對唔簡單甚至嘥氣。加上歷史加經驗之談,呢類喺本地算異類玩得咁唔本地嘅metal band,往往向海外發展先會得到應得嘅賞識同回報,遠嘅有Hyponic,近嘅一定係Karmacipher:


十年前Thornslaughter只出得到一隻demo(唔計Hyponic同Heresy呢班doom death老前輩,Cadaver之前香港應該未試過有death metal band成功出到碟?),之後得返兩個人繼續捱落去歌路band名都轉過唔止一次,製作經年終於嘔心瀝血出到香港第一隻dissonant death metal碟《Necroracle》,喺冇主動向海外宣傳嘅情況下,都俾大量外國metal網勁讚選為年度大碟。反觀香港,上年第二隻碟都出咗喇,而家仲大把人問緊邊隊係Karmacipher、乜嘢係dissonant death metal。


當夾band搞band房越來越難,穩穩陣陣開開心心夾夾band出出show順便媾媾女就係喺香港夾band嘅核心價值,正因呢種心態香港(metal) band好少有大突破大驚喜,所以玩得好我會支持,但會更尊敬Synergy呢類偏鋒樂隊,因為敢冒險走幾乎喺本地做唔到嘅路線,再而達到音樂上嘅成功,付出更大收獲更難,但做得到嘅可以更有效喺世界層面幫助推廣香港band整體。而之前已經差唔多逢係NOWED搞嘅香港/大陸metal gig就見得到佢哋嘅Synergy,出《LAIKA》之後正式由live台柱變成NOWED Records一份子,係時候把握向國際進軍喇。


噉係咪亦代表望咗好耐嘅INDenial X Synergy co-headline tour有冇機會成真?


Synergy@facebook

http://www.facebook.com/synergyhongkong


Synergy@Bandcamp

http://synergyprog.bandcamp.com


18/3/2018 Synergy "LAIKA" Album Release Show

https://www.facebook.com/events/140792759950492

2017年12月31日 星期日

聽花CD #6:Some stuff from 2017 I enjoy a lot




幾年前已經唔再做全年N大總結,因為當時投入好多時間去搵band去聽碟,最後只會發現都唔會發掘得晒,總結完一定會再發現其他更好聽更值得做年度N大嘅碟,今年仲要離港避世兩個月,已經脫節到連好多追開嘅band最近點今年有咩新歌新碟都唔知,更加唔使諗今年邊隻碟最好。見已經冇特別追band搵嘢聽時,今個年底居然都撞到三隻碟覺得唔錯,就集中講呢三隻算。

一向唔太迷美國black metal因為好兩極化,一係玩得好普通甚至唔掂,一係就好高水準或者好特別,而Xanthochroid叫自己「Cinematic Black Metal」,上一隻碟亦係第一隻大碟、2012年《Blessed He with Boils》甚至有啲似Emperor隻《Prometheus》。

當而家好多black metal band只求做到下一隊Behemoth或者Dimmu Borgir,佢哋反而會選擇走咁另類路線,加上我本身勁鍾意《Prometheus》自然特別留意佢哋,但係跟住只間中出吓新歌,cover幾首Wintersun做民謠,同將Opeth首《Harvest》變成symphonic black metal版,但係見會選呢啲歌cover都知佢哋唔普通。

五年之後終於再有新碟,加多把女聲變成好多男女清聲,仲一出就兩隻,籌備五年嘅雙碟概念專輯《Of Erthe and Axen》俾到佢哋種交響配樂black metal更大發揮。Act I做到好磅礡,Act II就較內歛似返之前,我鍾意Act I多啲因為我追求嘅symphonic black就係呢種,浮誇唔緊要全部夾埋合理就得,好似最後兩首組曲相當完美。Act II都好,只係在我欠缺Act I份爆發力,同鼓聲有點乾之餘mix得太出。不過呢兩隻碟係我好耐未試過會咁沉迷嘅black metal碟。

同樣五年未出過碟嘅「riot-opera」band Diablo Swing Orchestra都趕得切年底出新碟。一開始已經玩獨家嘅cabaret metal,當你隊band咁avant-garde自然好難賣,所以之前三隻碟都係三年一閏仲隻隻唔同label,新碟仲要隔足五年,而五年間可以發生好多事,好似第二次換女主音。

影響絕對唔細,因為前兩個都係女高音唱法,新歌妹用返傳統清聲,一唔覺意就會變成Nightwish翻版,但呢個轉變對佢哋反而係好事。雖然風格特別,玩完metal carabet想試新嘢,metal band配女高音加歌劇式男聲組合反而有限制,因為呢種唱法唔係種種歌路都夾,所以始終唔太捉到啱自己嘅路,之前三隻碟水準其實一直下滑緊。

新碟有五年時間加一個完全唔同唱法嘅女主音,今次終於清楚應該點樣做可以再創新之餘,唔用女高音反而為佢哋演唱方面帶嚟更大自由,新歌妹唱得之餘玩聲又勁,而家音樂玩得更放,俾返過去咗去耐嘅全盛期The End Records感覺我,作為一隊實驗樂隊,之前三隻碟相比之下反而有點保守。不過有個隱憂,其實上隻碟開始佢哋音樂已經好Muse,我反而驚之後會慢慢冇咗自己風格甚至越來越pop,但係再下隻碟應該又要等最少兩三年啦,到時可能歌路甚至歌妹又轉多次。

其實錯過咗今年係個好大遺憾,因為2017年好多新band出碟同舊band新碟都好勁,只係時間精神係唔夠就唔夠冇辦法,既然到年底至較空閒而主要發掘到呢三隻,今年就盡情享受呢三隻碟過年算。其實仲有一隻都想講講,就係Karmacipher喺2017年尾二一日出嘅新EP《陣獄》,不過得兩日時間而我想花多啲時間去認真煲煲呢隻碟,就等隻碟會出physical嘅時候再講返啦。(希望會出啦)

Xanthochroid@Bandcamp
http://xanthochroid.bandcamp.com

Diablo Swing Orchestra@facebook

http://www.facebook.com/diabloswingorchestra

2017年9月3日 星期日

聽花CD #5:INDenial《INDenial》


喺呢個metal發展停滯不前嘅年代,要出頭有兩條路,一係將自己嗰瓣練到好專,就算冇新意都有質素搭救,但當同一件事已經有無數人做緊做過,就只有寫歌技術都好頂級,再加運氣同際遇先可以成功。另一條路當然係唔行其他人行過嘅路,其實而家玩metal最大成就唔係人哋聽完你嘅歌會話「你哋好似邊隊」,而係「你哋好似呢隊,又有啲似嗰隊,但聽落又唔多似...」

所以會鍾意INDenial隻碟,因為玩得好嘅香港band多不勝數,但令你捉摸唔到嘅就好耐至撞得到一隊。籠統講係thrash,不過唔似聽慣聽熟典型,音樂入面搵得到九十年代美國thrash、二千年代偏thrash系嘅瑞典melodic death metal,同2010年之後嘅德國thrash,但幾種唔同年代同風格嘅thrash又撈得埋之餘唔夾硬。

字面上睇唔會係我最鍾意種metal,因為聽thrash個人喜好最緊要夠衝同有一定技術性,而INDenial根基近九十年代打後著重節奏感多過速度感種「post-thrash」,技術亦唔係好高超,但riff夠爽夠實淨,寫歌編曲亦順得嚟唔悶,唯獨鼓套路比較舊派,夾復古thrash足夠,但樂隊走新派路向時,就嫌打得太保守差少少火花。

雖然將最基本練到最穩打穩紮時你隊band已經冇得輸,如果只係完全玩返晒Machine Head種groove metal,都只會達到「勁但咪又係嗰啲」程度,來自現代金屬嘅影響就幫音樂提昇唔少,雙主音、樂器聲人聲加effect同最後首歌加女聲呢類手法,令音樂多一份摩登色彩唔會太老土或典型,而且錄音加咗好多好多印象分。

其實我自己唔算好鍾意djent興起之後嘅現代metal錄音,整體數碼處理到冇晒雜質甚至有點假,人聲同樂器好似互相鬥大聲鬥突出,大家都咁高咁大企得咁前時,做得好係一幅音牆,執得唔好就好易令整體平面化。隻碟係有少少缺憾,好似鼓聲唔夠真實感之餘感覺唔太夾其他,同有時metal都係粗糙返少少比較好,不過音樂唔太old-school thrash加有點新派時用呢種聲效果幾好,而且製作水準加同音樂配合嘅程度,《INDenial》絕對數一數二:

近年有三隻香港metal碟:卸甲《皇者令》、Karmacipher《Necroracle》同INDenial《INDenial》,都係本地製作而錄音質素直迫國際水準,簡直係省靚「Made in Hong Kong」招牌嘅portfolio級作品。

全碟我最鍾意嗰樣係唱。成日覺得香港band出碟有兩大挑戰,就係鼓聲錄得靚加隻聲夾到音樂同其他樂器,同主音CD內外都聲好唱功勁。INDenial強處唔止雙歌佬,仲有主歌佬本身把聲已經強而有力加聲線獨特辨識度好高,但唔會只一清一拆走天涯而再有變化,聽咗十幾年香港metal,呢個歌佬都算最啱feel。

折衷派thrash加上歌佬聲線特別之餘唱功恆得嚟多變嘅組合,聽完諗起Darkane,當Darkane係我數一數二鍾意嘅thrash death/melodic death band甚至metal band,而你音樂特別歌佬可以令我聯想到呢隊可能係瑞典melodic death metal最被忽視嘅樂隊時,我就係好難唔鍾意你隻碟。只不過亦有另一個問題:CD入面唱得真係好勁,但係現場似乎未能夠完全唱返晒,所以聽完碟再睇live就會覺得有一段距離。當練到live都唱到晒《Deadly Carnival》,就真正做到CD內外一樣咁強,嚟緊九月中就要去北京幫Kreator做開場,咁難得搵到呢種機會,事前一定要操多啲練好把聲同度氣,到時一定要搏到盡唔好失禮,唱到第二日入醫院都要去盡佢呀。

音樂我係完全冇問題甚至會俾好高分,但隻碟本身就幾大問題。美術好重都市味,好摩登搞到似alternative rock band出碟,metal碟設計都係惡少少或者有議題較合適,同歌詞係一張張明信片,一唔覺意跌咗張咪大鑊?同點解要出到咁大盒呢,突成截出嚟搵位擺已經難,仲要成個紙盒一有穿有爛就冇得救,我個盒就係一唔小心責皺咗噉就拜拜。音樂點new-school冇所謂,但出碟個型式可唔可以old-school返少少呢,簡簡單單出隻CD就得架喇...

INDenial@facebook
http://www.facebook.com/INDenialHK

INDenial@Bandcamp
http://INDenial.bandcamp.com

2017年9月1日 星期五

聽花CD #4:Escharotic《Escharotic》Digi EP


「聽花CD」第一篇,反而唔係想寫CD。香港女聲metal fest The Voice of Sirens II比I成功,除咗樂隊夠多元化加隊隊都玩得好好(如果我話我鍾意二人組合嘅The Pafala多過三人組,會唔會俾人打),Escharotic隻digi EP亦係一大焦點。

用USB drive出single甚至專輯,無論主流還是獨立都賣咗好多年(場show早少少時間有個韓星出USB single,講到前無古人後無來者,見到笑而不語),不過作為一個音樂媒介優勢唔大,除咗一定要插電腦先有得聽(以前問題冇咁大,但而家有啲人真係屋企唔開電腦甚至冇電腦),仲似買精品多過買音樂。以前買過兩隻,陳奕迅隻手指整到成餅錄音帶噉樣,開嚟睇MV之後就收返埋冇掂過,USB本身就係賣細隻,你唔係叫我拎住咁大餅周圍去吖嘛?另一隻直到飛咗去屋企唔知邊度都未聽過,甚至連嗰隻USB係邊個出都冇晒記憶。

Escharotic醒在唔只得一隻USB手指,而係賣成部MP3機俾你,睇完show一出門口插隻耳筒已經立即有得聽,當隻EP五首歌四個字長,由HA返到屋企已經夠聽兩次,而當好多時買碟只為支持同收藏,十隻碟八隻拎到返屋企都唔會聽甚至唔會開,呢隻digi EP已經贏在令我最少聽過兩次,跟住仲可以入其他歌出街聽。當普通USB手指用除咗好大隻亦冇乜問題,好多artist賣USB隻手指整到鬼咁多花款真係唔多想用,就算唔怕整花整爛捨得用,有啲一插就autoplay成堆歌同片,點拎返公司用呀?

不過最正其實係個袋,估唔到買細細部MP3機有得送大大個環保袋,size剛剛好放到我部電腦,唯一煩惱係每次出去開會都要解釋俾班客聽點解我個電腦袋咁brutal。與其送一大堆拎到返屋企得個擺字用唔著唔要又唔係嘅雞肋,真係寧願你送個環保袋俾我仲實際。

至於音樂唔使講太多,香港最似Arch Enemy嘅band一定係Escharotic,但成也AE敗也AE,音樂非常似後期Arch Enemy唔算新穎,不過當你路線係純melodic death時規限自然大,就唔會求有大突破只求質素,呢方面就絕對交足貨,錄音反而值得講講。而家獨立製作要做到接近專業級質素唔難,但metal一向唔係靚聲就好,每種metal都有屬於自己嘅年代感同錄音製作方法,選擇配合自己音樂嘅聲音更加重要,可以想像一下用djent聲玩black metal會有幾柒(你話你玩post-black就另計啦)。

隻EP以而家indie band錄音水平計可能只夠當demo,但音質同層次感已經唔會輸俾好多人,最重要捕捉得到需要同配合自己嘅感覺,單單入耳已經舒服過印象正面過好多碟,因為說服到我「係嗰樣嘢」。錄音質素可以更高當然更好,但除咗有時太靚反而失去應有感覺,仲有一個現實問題:你想追求某隊band或者某個外國級數嘅錄音,必須要有一定器材同技術,而且無可避免會被拎嚟同外國比較,唔夠資本同信心做到時就好易兩頭唔到岸。與其俾人話似某隊外國band但下一句就係唔夠人靚聲,我寧願製作質素唔係頂級,但聽嘅人會感受到你同你所代表種音樂份真實。

digi EP呢招精彩,不過我份人比較老土,有得揀都係鍾意買CD,所以正式出碟時,都係正正經經出返CD啦唔該。 (同出普通膠盒版得架喇,最鬼驚digipak同禮盒裝,唔知點放好爛咗又冇得救,就好似下一次我寫嗰隻)

Escharotic@facebook
http://www.facebook.com/EscharoticHK

Escharotic@Bandcamp
http://escharotic.bandcamp.com

2017年8月30日 星期三

聽花CD #3:A New Beginning


重開專欄講音樂,既然決定重新上路,今次用一個新方法開始。之前執碟有個櫃終於執到吉咗一半(其實只係夾硬將嗰一半搬去其他眼不見為淨嘅暗角),跟住屋入面見得到嘅碟都望一次,想聽同想寫嘅抽晒出嚟,再慢慢諗寫乜同點寫。

一隻隻碟寫有時會好悶(同冇咁多時間逐隻寫),新專欄想試吓唔同寫法,好似幾隊band幾隻碟撈埋一齊寫,寫吓跨媒介題材,甚至唔寫音樂寫吓工業同文化,雖然我寫嘢成日拉到好遠離晒題,「聽花CD」呢個專欄都會盡量集中CD同音樂上面。

執出嚟啲碟想夾埋寫嘅紮埋一舊,跟住好似俄羅斯方塊一舊舊堆高佢,啱啱好質滿半隻櫃,我老母見到都話

「十幾年嚟第一次見你啲嘢咁企理。」

一紮碟一個project,未計單碟已經有六十個project,以我寫文嘅速度分分鐘一個月先出到一篇,就算唔再加新碟已經夠寫幾年,當然前提係唔會爛尾先。咁多年嚟耐唔耐就會嘗試唔同形式嘅專題寫作,不過多數維持一段時間就無以為繼,因為要定期出文時間同心機消耗好大,好耐以前仲會投稿俾網站同雜誌專欄就冇計迫住起貨,到純粹為自己興趣時冇承擔自然會hea,寫到咁上下或者返工忙屋企多事就會放低甚至放棄。希望咁難得準備晒成櫃碟俾自己寫,「聽花CD」可以的起心肝成為一個長遠發展嘅寫作計劃啦。

(然後話,咁難得執到個櫃咁靚,再拎返落嚟咪搞到亂晒又要執過?都係由佢唔好搞算啦唔好寫喇)

2017年8月29日 星期二

聽花CD #2:Hear Flower CD: The Provenance


好耐未認真寫過碟評,你叫我用香港話亂啡幾百幾千字講一隻碟其實唔難,但要好似以前投稿時期用書面語正正經經寫,一個禮拜寫到一篇已經算好快。所以十年前仲係台灣前衛金屬誌論壇管理員時搞過個「每週一唱片大行動」,就係迫自己每個禮拜最少寫一隻碟,不過只堅持到一段時間,因為以我寫文嘅仔細程度同長度,要定期認真寫碟評絕對稱得上係苦差,離開TRHK之後都好少再寫喇。

不過早排煲返好多香港band同indie舊碟,又挑返起舖寫文癮。其實有諗過開個樂評page,但當以前返學同份工較得閒時一星期寫一隻碟已經係個大挑戰,我諗直到謝安琪再出碟之前都唔會再寫論文式「專業」樂評,開個page但一兩個月先出一篇文就冇意思啦。而且你知身在香港地開得呢種page,一定大把人挑你機話你寫啲嘢錯乜漏乜,所以都係留返喺自己地盤,聽完一隻碟有嘢想寫,有心情又有時間時咪用唔認真嘅方式講講佢,自己匿埋打吓飛機就算啦。

仲有一個原因,因為遲出世加太遲開始聽音樂,失去經歷香港樂隊同獨立音樂最輝煌時代嘅機會,只有靠之後聽人講返同自己追返,再開始寫樂評就係多一個理由俾自己發掘歷史,同重溫返早前買落但未聽真嘅CD,寫吓新band新碟之餘亦分享返舊band舊碟。你知啦,香港地嚟緊冇乜show睇架喇,冇show評寫時咪寫吓碟評囉...

對我嚟講寫作最難嗰樣唔係寫得好而係改名,成日篇文寫完都諗唔到叫咩好就亂咁嚟,所以你見劉Sir啲文啲page堆標題成日九唔搭八,我真係覺得改名好難。不過今次開個樂評專區,第一樣就係起個名叫「聽花CD」,全因呢樣就係導火線,唔係因為有想聽返嘅舊碟已經聽到花晒播唔到燒唔返,就唔會去節拍去二手舖去HMV開倉上Yahoo拍賣掃成堆碟,繼而促成有興趣寫返碟評。

同改呢個名,亦係希望喺呢個數碼世代,可以搵到下一隻會俾我聽花嘅CD,唔知仲有冇機會撞到呢種可以俾你聽到花嘅神作?



2017年7月29日 星期六

聽花CD #1:聽花CD:序


好耐未試過掃咁多碟。呢幾年多數去睇show同去日本先會瘋狂買碟,係呢兩個月無端端挑起執舊香港碟舖癮,又撞著HMV清倉加Yahoo有人放,結果一掃就十幾廿隻。

今次要多謝各位兄弟,一個月前提到想執返黃秋生兩隻碟同余力機構兩隻碟,一個月後全部入手再加意外收穫,出外真係靠朋友。其實除咗余力機構第一隻其他全部都有,買完又買因為我份人太過old-school,不過唔係咁old-school又點會搵咁老土嘅碟呢。

陳輝陽、因葵同余力姬夾埋嘅余力機構,係一個香港地有才華有態度只會揾唔到食嘅實證。九七年第一隻碟其實有點大路,雖然同同期香港流行音樂比較已經相當另類,因葵走咗之後三年磨一劍,第二隻碟《快活》變咗玩嘢rock,今時今日聽仲會覺得好前衛。我諗陳輝揚成世人最開心應該係呢幾年,佢畢生才華貢獻晒俾呢兩隻碟,余力姬把聲唔係超靚,但正正帶點粗糙更配合陳輝揚咁真誠嘅音樂。

不過當你隻碟過咗廿年再聽仲會覺得超前晒廿年之後嘅音樂,喺'90尾'00頭嘅香港絕對唔係好事,只代表出碟時走得太前嘅你死得好快。正如《快活》絕對屬於香港音樂經典之一,但問吓身邊有幾多人知呢隻碟甚至識得余力機構呢個組合?佢哋個名廿年後突然有人提起,都因為首《活著》俾人翻唱,唔係謝安琪佢首《活著》係原創,而係同余力機構所代表嘅完全相反嘅Twins其中一個,聽完佢唱只會令你更加懷念佢哋。如果謝安琪首《活著》先係翻唱,你話會幾美好。

香港地好現實,玩到識飛都用,係搵唔到食就要向現實低頭,嗰陣香港仲未接受到呢種音樂,再過幾年先開始欣賞唱作歌手同實力派,早咗出道嘅余力機構兩隻碟之後無以為繼唔算意外。陳輝揚轉做幕後跟住寫K歌寫到出晒名,係呀完全冇晒余力機構時期火花,人哋搵到食仲有名有利喎你吹咩?至於余力姬,維基百科話去咗美國做律師。你話搵錢至上到做嘅嘢搵唔到食就連活著空間都冇嘅香港,抹殺咗幾多有才之士同理想。

黃秋生唱作路好相似,第一隻碟國語加粵語alternative pop跟住第二隻變成全粵語indie rock,仲要比余力機構再早幾年出碟市道同接受性更差,不過佢算演而優則唱冇咁辛苦,有後路時個project自然去到幾盡都冇所謂,最少余力機構唔會唱粗口歌先啦。同有江湖地位時吹雞自然有號召力得多,你估請得郁黑鳥成員幫你寫歌同邱禮濤肯幫你拍MV真係個個做得到咩。

同其他轉型歌手唔同,黃秋生好清楚自己想做乜,同搵咩人合作會做得出佢想要嘅音樂,根本就唔志在最後成功與否,係要成功要賣得要紅就唔會唱粗口歌啦,而且喺地下做土皇帝唔開心得過上主流做路人甲?雖然論歌我比較鍾意rock底嘅《地踎搖滾》,其實《支離疏》較有性格,兩隻碟歌路都好雜,同時好多歌都會搵到模彷某外國樂隊嘅感覺,但呢份tribute味《地踎搖滾》比較重,呢個係八九十年代香港(獨立)音樂通病,因為仲處於追隨同學習外國階段,好少可以建立到完全屬於自己嘅聲音。是但啦,聽《吓》聽《地踎搖滾》兩首已經夠殺啦,呢兩隻碟份爛仔同地下味好真實,之後都冇幾多香港band香港碟玩得返。

本來只打算執返呢四隻突然想聽返嘅碟,不過跟住越來越大鑊。唔知點解我行二手舖從來冇乜運,想要嘅一係行極都冇,撞到都只得一二三百蚊炒價貨,偏偏其他人就係無論去邊區行邊間都搵得到,仲經常只需要一二十蚊執笠價,呢四隻都靠兄弟幫手至搵得返,不過成日煩人唔係路亦唔多好意思,就開始上Yahoo拍賣。

其實Yahoo真係好多寶藏,耐唔耐會有人放香港indie同band舊碟,當然有啲係炒家而且炒起上嚟可以好癲,好似搵緊余力機構隻《快活》時Yahoo有兩個人放緊,有隻二手最後炒到$320,就算隻碟絕版我亦好想聽返(同,其實本身我已經有...),都唔會捨得俾咁天價去買。最抵死另一個人放隻全新先賣兩舊水,唔知三百二贏到隻二手條友最後喊咗幾耐呢。同,我隻夜冷二手$20,夾埋用咗唔使Yahoo十份一價錢執晒佢哋全線兩隻,之後HMV再執多隻全新都係$60...

所以玩Yahoo拍賣最緊要係耐性,好多時肯等都會等得到夜冷價平貨,好似百無聊賴時見到有套亞龍大頭三隻$250,隻《Action Figures》仲要全新未拆,其實聽metal咁多年都冇乜聽過佢哋就執啦,買完之後就有人放平貨,$18隻《大車店》邊度搵呀,三隻分開買夾埋都唔使一舊水。唯有當俾多咗係為套碟99%新冇花仲有側標,加有隻未拆絕版貨囉,雖然買到返嚟都係照開嚟聽架啦,其實蠢咗如果另外買多隻四五十蚊二手,隻全新《Action Figures》過一排再擺上去放可能已經放到$250,不過我份人唔多鍾意呢種炒賣行為只為音樂,係賺少好多錢架喇。(呢個故事亦教訓大家,第時想執平碟記住跟住劉Sir,佢每次買完一隻碟之後好快就會有人放平貨)

其實Yahoo之外facebook二手CD拍賣區都好多寶,好似黃秋生之前搵極唔見,《支離疏》算易搵係唔知點解《地踎搖滾》好少見二手舖有貨,到我集齊之後立即好多人放佢嘅碟標價五六十蚊亦唔貴,但我份人始終比較懶唔慣成日望實有咩執,加上好多頭版碟絕版碟貴到飛起想買都唔捨得,呢個時候就輪到HMV出場喇。

又係靠朋友,唔係身邊有人單聲都唔知佢哋搞全場八折感謝祭,metal碟就算啦我更有興趣掃返復黑王同舊indie碟,小島Chyna浮世繪Raidas呢啲五六十蚊一隻唔使諗見到就掃啦,如果上Yahoo買初版貴幾倍呀,我只求有得聽唔志在收藏時買復黑王已經好足夠,仲要之前猛咁搵余力機構,點知去到銅鑼灣大大隻放喺度冇人要,唔使煩喇俾多六條執埋佢啦。

其實有幾隻碟已經唔係第一次買,黃秋生兩隻一早有,余力機構隻《快活》屋企直頭有最少兩隻,你未經歷過十幾年前嘅聽歌生活,未必明一隻碟點解可以買多過一次。想當年屋企部機harddisc得四十幾激,裝完Windows呀Office呀得返一半,全家人爭一部得廿激harddisc嘅電腦,想燒MP3只可以燒128K仲要揀碟燒。其實128K音質已經唔差,當換咗新機harddisc大咗時,自然想燒返320K追求一下或燒返當年冇燒到MP3嘅碟,但簡單的話就唔使咁煩啦。

當時寬頻未普及加好多碟特別地下band根本冇得download,想聽metal同indie只有靠買碟,每個月份零用份糧差唔多貢獻晒俾各大小CD舖,而住喺香港一大問題係土地問題。我鍾意一隊band慣咗買全線,而一隊老band全線過十隻碟好平常,所以開始聽音樂第一年已經買咗過千隻碟,後來開始收手時屋企已經有三千幾隻碟(但碟仍然會繼續買),已經自暴自棄到一個地步CD櫃都唔用,總之邊個位擺嘢唔會俾老母小,新買啲碟就揳落去啦,問題就係今日買咗隻碟唔立即聽立即燒的話,第二日已經唔知揳咗去邊唔見咗。

所以當一隻CD唔係買嚟儲時會一買再買不離三個原因,一係當你好想聽返或者燒返一隻碟,但首先要面對屋企個四五千隻CD碟海,你會寧願放棄直接買過隻算,好似浮世繪隻《愛花的少年》,第一隻買完返嚟未開已經唔知飛咗去邊,突然心血來潮想聽返HMV又開倉,咪煩喇買過隻再執埋《知道不知道》儲返齊一套啦。

另一個原因就係聽到花。而家嘅人好難想像聽花一隻CD,因為好多時只會開一次燒MP3(我都係),加上而家上網stream就得,好多時買碟只為儲返physical支持隊band,買到返嚟拆都唔拆用嚟擺唔係用嚟聽(我都係...)。但十幾年前冇Youtube冇streaming,就算買咗碟屋企部電腦都冇位燒MP3,有啲碟就只有播CD聽,有時粗聽得滯會搞到隻碟花晒聽唔到,我隻黃秋生就係例子。

而最後一個原因,就真係為收藏甚至保育。香港band而家出碟都難,更何況二三十年前?復黑王都叫會幫大band經典碟印多一兩水,地下band當年印幾百隻就永遠只得嗰幾百隻,少一隻就冇一隻再搵唔返,所以就算自己已經有或者唔啱,每次見到都執咗先,寧願第時撞到有心人想要時平放俾佢,都好過啲碟放喺度永世冇人理,最後俾人當垃圾送去堆填區咁浪費。

所以有啲碟,唔會理音樂好唔好同自己有冇,總之見到就會買,余力機構隻《快活》我HMV開倉買呢隻應該已經係第四隻,仲要加埋有兩隻全新未拆,而DSC同Azylum兩隻碟我屋企應該各有最少五六隻。所以我其實有潛質做炒家,當《快活》二手Yahoo可以賣到$320,我屋企兩隻全新賣得晒已經抵返晒呢兩個月嘅買碟錢,加埋其他好多絕版碟,過多幾年可能每隻標一兩百都放到。可惜呢,我份人買碟就真係只為聽音樂...

呢個月不停煲呢堆舊碟,聽得出好多味道。Raidas出名在《傳說》,雖然同類歌路當中我都係鍾意浮世繪隻《愛花的少年》多啲,不過一比第二隻時浮世繪就輸好多,《知道不知道》pop好多仲玩到港台節目主題曲咁健康唔太慣,相反band味重過電味嘅《Raidas》就一定係香港band碟中嘅經典,齋聽好鬼靚嘅結他已經好滿足。Chyna隻碟又話有首兩個字長drum solo,點知得分半鐘,同隻碟先得廿幾分鐘EP長度,好在後半唔錯,雖然都好pop,不過當年嘅主流rock/metal係咁大路,你album track玩得夠火我都收貨架喇。

嫌太大路咪聽亞龍大,第一隻碟種爛撻撻真係冇得輸,第二隻碟已經太pop,第三隻雖然唔再metal但玩得幾Alice in Chains,未至於咁多人講到咁差。而聽完余力機構,之後應該要追溯埋天織堂。而家聽返廿幾年前嘅香港band同indie,仍然會覺得好好聽,唔係因為舊一定好聽,而係佢哋其實玩得好前衛,又或者話而家嘅香港band其實有點倒退。

余力機構好多歌根本就係佢哋唔玩幾年之後,王菀之出道頭幾隻碟嘅風格,只不過佢哋玩時啲人覺得好怪唔理,要隔幾年市道轉咗,王菀之再玩大家先開始接受覺得好創新,而佢哋較另類嘅歌好似好Velvet Underground嘅《三分鐘宇宙論》,根本就係好多好多年之後My Little Airport等文青樂隊想做嘅,正因生不逢時令余力機構只能成為一個獨立傳奇。

你唔會預而家仲有人玩synthpop同new wave,但《Raidas》好AOR嘅歌路同而家好多北歐hard rock/heavy metal band玩緊嘅差唔多更加唔會輸,而Raidas特別之處係營造到當時至而家都好少香港band會做或做得出嘅epic感覺。要唔靚要metal嘅,好多人知道亞龍大只因為LMF,但LMF後來已經只餘潮味,想搵返地下感覺咪聽返亞龍大第一隻,當而家嘅香港(metal) band不停追求更靚更新派時,反而失去咗《亞龍大》同黃秋生頭兩隻碟份真誠。

呢個係而家香港band界死結:睇落好似發展得好快、音樂不斷有新嘗試,但實際上落入一個循環,好多廿幾年前嘅香港band/indie artist根本就係玩緊而家嘅香港獨立音樂,又或者話而家香港只係回頭追求復黑王所代表個時代嘅創作高峰。

舊band襟聽唔止音樂多元化,各大小樂隊風格百花齊放,就算一個獨立artist自己歌路都可以好廣闊,但更優勝之處係當時嘅band聽得出感情好豐富,聽同一隊band唔同碟感受已經可以非常唔同。而家嘅band技術同製作資源一定比以前高,偏偏主流感情都係好重壓抑感好低迷,大家想表達嘅好似冇乜大波動大分別甚至唔多想表達,或者更直接只追求節奏同技術走感官路線,用太多電腦執到乜都好整齊好靚嘅新一代錄音製作方式有一定影響。

所以新band會聽,但真係冇太多碟會俾得返舊band嘅感覺同豐富感情,所以每聽完一輪新band新音樂,多數會回頭尋尋根。我相信我會繼續追一排復黑王同舊band碟。哎吔,Yahoo隻天織堂俾人搶咗添...