熱門文章

2014年1月7日 星期二

兩件無記瑣事

今日係邵逸夫過身之日,雖然無線電視早就唔再係大家熱愛同支持嘅無線電視,始終邵爵士真正離去,都有住一層無線正式沒落之象徵意義。而今日放工時,就遇到兩件同無線有關嘅瑣事。

話說今日同個客開會搞到七點幾先放工,一出公司門口就撞到布偉傑,呢繼河國榮之後無記最多人認得同鍾意嗰個鬼佬呢。同我一齊等電梯搭電梯過馬路,真人好高,加埋個金毛頭好型,不過我都淨係記得佢幾年前俾人踢爆拍過鹹片跟住潛咗一輪水單嘢。(真衰,成日淨係記住人哋呢啲嘢)

返工棟大廈有電視,今日梗係無限loop邵爵士離世啦,但有樣嘢好得意:咦,邵逸夫喎自己個台個老細喎冇佢就冇無線喎,點解無線台徽居然仲係彩色唔會變黑白?所以咪話「象徵意義」囉,咁大件事居然台徽仲可以色彩繽紛喜氣洋洋,證明無線一早已經認住自己老細唔係姓邵,而係姓方。分分鐘係姓方個「老細」叫唔好轉黑白台徽添。

沒有留言:

張貼留言