熱門文章

2014年3月31日 星期一

我要喪目及香港bass妽口牙!:Dovey《花影重來》專輯發佈會




Dovey場show,我想說的是,只不過遲半個字入場嗟,使唔使多人到一入門口已經行步路都難,爆到可以直接企台邊睇背脊咁灰,嚟聽歌嘅咩我嚟為目及女架咋,點解要噉對我?Dovey我細細個已經聽到呢個名,佢哋有幾多年我就知道幾多年,但到十年後佢哋出碟先第一次見佢哋真人,有點相逢恨晚的感覺,台灣有Doris,原來香港都有bass女神,口烏口牙~

或者女仔諗嘢唔同啲,我鍾意今場唔係開場band甲>開場band乙>主角出場>玩完感觸幾句>有緣再會,而好似大演唱會嘉賓中間至出場再同headliner玩玩crossover,更能突出全晚係一場紀念樂隊出碟嘅盛事而非單純雜錦gig。不過老實我覺得演出方面有點遜色,若以一隊夾咗十年出過無數show嘅rock band計,Dovey台風同技術仍有待進步空間,鐵樹蘭狀態亦有點失準,全場最穩定反而係同樣第一次睇嘅AMS。不過Dovey歌妹就真係好好好勁。

其實反而冇諗過真係會咁感觸有成半個鐘喊晒口講感受,又可能女仔唔同啲啦感性啲嘛,如果換著係一班麻甩佬同我講半個鐘耶穌,我肯肯定一巴巴車埋去「屌那星搞show出碟咪搞show出碟囉使唔使咁Q婆媽呀頂你個肺」,不過呢場唔會啦你講多個鐘我都唔會介意嘅,鬼叫靚女大晒咩,咪講咗囉我買飛入場目及女嘅嗟嚟聽歌嘅咩。

至於隻碟,或者因為今場live唔算玩得好好,返屋企聽碟先聽得出真章,作曲編曲器樂錄音都相當成熟,比絕大部份聽過嘅同類型獨立樂隊甚至主流歌手更好,所以更加感慨,一隊band創作表演有如此質素,居然都可以要捱十年至叫做有一番成就,有冇搞錯?不過有兩個問題:一係好歌唔少(我覺得後半隻碟先至真正反映到樂隊音樂性格),但缺少好特別好突出嘅曲目,畢竟歌路本身已有一定局限。最與別不同自然係《花影重來》,作為放全碟最後嘅「隱藏曲目」(其實點解隻碟會完全唔提呢首主題曲嘅存在咁故弄玄虛呢),創作概念同感覺明顯同其他歌唔同indie氣息亦最重,只份氣氛建立得非常出色,點知唱到最後一句突然急停,就令高潮變成反高潮,因為到呢一刻首歌感覺係只完結一章而唔係整體完結,跟住再接一段post-rock式純演奏outro作為全曲同全碟結尾更適合,而家唱完就冇,只覺浪費咗個編曲,聽落好似仲係首demo未寫好一樣。(會唔會正因為噉所以名都冇出呢)

而第二個問題呢...當你以為逆流好鬼靚嗰個digipak已經叫做惡搞,點知一pak還有一pak煩膠,《花影重來》音樂是正的,只係個包裝實在一頭霧水,會拍埋片教你點樣開盒已經知道有幾誇張啦,拎隻碟出嚟已經整到個盒爛爛哋,點知收返埋嗰嘢先至係真正挑戰,最弊成個盒卡紙嚟size又大過CD盒少少放都唔知點放好,真係開一次就(受)夠。呢隻碟你可以話係一件收藏品多過一張唱片。我同意聽與視覺俱存係獨立藝術精神一部份,只係而家買indie band CD幾乎已經搵唔到仲會用CD盒嘅唱片通通變晒digipak,而且好少正正經經必定花臣多多,樂隊對唱片包裝追求,已經開始出現當年Twins時代主流唱片公司追求華多於實份心態。希望各位樂隊仁兄高抬貴手,出碟簡簡單單就算唔好搞到個包裝好似玩扭計骰噉啦,我聽歌架咋。

2014年3月30日 星期日

[Kowloon Metal City: Fun Stuff]《This is a Trent Reznor Song》:可能是世界上最精彩也最搞笑的tribute

http://youtu.be/4xg-Wk2DEXs


一個Nine Inch Nails的fans(好似係),寫了一首《This is a Trent Reznor Song》給Trent Reznor,投訴/讚賞了他們的歌曲如何地機械化,而且不止歌曲,就連MV都非常忠於NIN的捕捉了那一份神韻。不是最忠實的樂迷,怎能夠作出這樣登峰造極的致敬?


Here comes the ultimate tribute in history: a (maybe) Nine Inch Nails fan wrote a song, "This is a Trent Reznor Song", as a tribute to Trent Reznor and his bandmates, complimenting/complaining their mechanical way to write songs. Accompanying with an "official video", hilarity ensues. Only the ultimate fan can tell the band how hard they suck with such clarity, both sonically and visually.

2014年3月27日 星期四

每週一相片大行動 2014 Week 13:多謝傻人,我們才能有在香港看到Laibach的傻福




Laibach場show兩個幾鐘長個場又聲好環境正,雖然投影機猛死Windows出blue screen of death就真係好industrial,同初頭諗住會好Test Dept.點知反而玩到跳晒舞十分開心,都係一場好睇抵睇到你唔信嘅精彩音樂會。要講/識講嘅早已講晒,無謂繼續獻拙,再擦多擦主辦單位鞋就算啦。

其實Laibach嚟香港唔止開一場音樂會咁簡單,而係一場革命,一場《新文化大革命》,除咗表演仲有展覽有講座,亦唔係隨便租個場而喺Vine Center搞場地音響落足本,已經同做到成個藝術節一樣冇分別,我向來睇完show唔會儲飛,今場例外,黑底熨金實在太靚,仲要有埋香港站獨家MCD,設計一流而且四首歌入面一首係英國國歌、一首係中國國歌、加多首unreleased track,計算得非常精心。另一靚係tee,雖然唔係Made in China(不過Made in Haiti),賣$220一件就有點奢侈,如果唔過兩舊水我會買多一件,話晒有幾隻淺色揀,基本上而家唔係黑色嘅band tee已經一定買架喇,更何況香港站特別版款款設計同意念我都鍾意。

如此排場、如此製作水準、如此週邊商品質素,已經屬於明星級數,當然Laibach亦絕對夠資格稱為明星,不過我哋睇得到唔係因為佢哋好大好出名,而係三生有幸。聽音樂一班覺得勁覺得經典覺得唔可以錯過冇用,即使咁具藝術氣質同內涵,政府藝術節唔會請,因為唔係正統學院派;商家財團唔會請,因為唔夠大路,「Daft Punk,電音?Good!Laibach,工業噪音?No!」到頭來都只能夠indie地搞。自己搞過外國樂隊show,所以好明白主辦單位其實同燒錢冇咩分別,雖然Laibach呢場人數唔叫多 - 預售已經$690真係好大影響啩 - 場面同將近十年前意外地少人嘅Nine Inch Nails香港演唱會相比都唔算好失禮,只係就當場入面幾百人都係真金白銀買飛入場、都有俾錢買tee買海報,其實亦唔幫得幾多,因為要請Laibach呢個級數加搞到咁大規模,就算賣晒飛全場爆滿再大家都肯俾多幾舊水買嘢支持,應該都回唔到本。更何況,你知香港地幾多大老細架啦:

「我鍾意音樂,我想睇演唱會,但你唔好要我為音樂同你一齊捱!要我七舊水睇唔撚係啩?四舊水都俾多你啦,仲要唔係(請在此填上任何潮band名)!」

所以而家香港獨立樂壇需要傻人,唔係間唔中有人傻傻哋肯拎幾(十)萬出嚟,好多樂隊你都唔使旨意有機會喺香港睇到。如果問我將來香港傻人會越嚟越多定越嚟越少,我答你一定只會更多,其實好多呢類人倒錢落海時就未必係傻反而思路清晰知道自己做緊乜,不過仆心仆命蝕住錢搞show之餘仲要俾班老細呼天搶地「我想睇但點解你收得咁貴」、「我肯俾錢但點解你唔係請邊隊邊隊」,結果就俾人迫到變咗真傻。

2014年3月23日 星期日

[非微音樂 F.A.M.E.: Video] "Ten Second Songs", 20 Ways to Be Hilariously Entertaining




http://youtu.be/jus7S5vBJyU


一位(點睇都係metal友黎的)仁兄以"Ten Second Songs"名義重唱了Katy Perry的《Dark Horse》,過癮在一首歌之中模仿了二十個不同的歌手/樂隊,有Pantera、Metallica和Slipknot這些金屬樂隊而且扮得神似,連Type O Negative的吸血殭屍唱法都試了十分意外,重演Tech N9ne的speed rap也很不錯。無論本身喜歡那種音樂類型都該一看,保證能博得一笑。

Not totally metal, yet very metal. The "Ten Second Songs" dude, suspiciously a metalhead, covered Katy Perry's "Dark Horse" in 20 different styles. In the mix are as-close-as-you-can-get imitations of your favourite metal bands like Iron Maiden, Pantera, Metallica, Slipknot and the totally unexpected Type O Negative. That Tech N9ne play is awesome as hell also. Just experience this hilarious experiment.

[非微音樂 F.A.M.E.: 議題] 看完Laibach,首先想到的,是「香港樂壇最後希望」的希望




http://youtu.be/A_3QXt4iL10


Laibach來港演出,超乎預期地精彩,看完反而想到這有關本地音樂的一點:如今很多人如林夕,都表示王菀之是香港樂壇的新希望甚至最後希望,她或可寫出或派出《天堂有路》與《留白》這些在本地已算很另類很前衛的歌曲,但又能不能寫或敢不敢派像Laibach的《中華》這樣的歌?不求能做到達明一派似褒實貶那份玩味,可以不流於表面又不俗套不媚權貴已足夠。

若討厭政治、受制政治、妥協政治,不論如何有才,也等同甘願斷送自已的創作生涯,有妥協就有局限,有局限就不可能隨心所欲。這一點不止香港,現在面對祖家亂局的台灣音樂人也要思索這問題。

2014年3月22日 星期六

每週一相片大行動 2014 Week 12:真.黑椒漢堡大戰2014




2008.帝皇黑椒漢堡:《劉Sir個網七週年誌慶之黑椒漢堡s》
http://lau-sir.com/mcpeppers/mcpeppers.html

2011.黑椒珍堡:《從新黑椒漢堡看麥當奴與香港經濟之衰落》
http://lau- sir.com/one_week_one_photo/2011_week42.html

2012.珍寶黑椒漢堡:《真.黑椒漢堡大戰2012》
http://lau- sir.com/one_week_one_photo/2012_week45.html


說來慚愧,作為黑椒漢堡忠實fans,每年只得半個月有得食,所以每次到此神聖兩星期都會異常虔誠,買一個普通版加一個特別版合體自製帝皇版已成年度傳統,不 過咁大件事上年居然遺忘,因為有更具挑戰性的咖哩漢堡挑機。今年黑椒漢堡居然一反常態 ,唔係年中年底跟住將軍漢堡出,而會排年頭失驚無神檔期,今次終於唔會忽略冇唔記得喇,隔一年再次延續邊食黑椒漢堡邊睇香港經濟的年度活動。

我都冇諗過會噉講:麥記真係良心企業。以前細個成日食麥記因為平,當茶記十尾廿頭一個碟頭飯,麥記一個餐可以平多幾蚊,而當年的幾蚊購買力唔細,對零用 錢唔係多的小朋友黎講吸引力非常大,想儲錢買野食買野玩,就係靠每餐麥記慳埋幾蚊儲落去買架喇。跟住唔使講啦,大個之後麥記反而由窮人食府變成有錢人先食得 起,食個餐唔飽肚仲要貴過食茶記客飯傻的嗎,好在百屌成材大家最拮据時候肯出平包平餐,好多時出街唔捨得使錢就係靠佢,尤其而家出尖沙咀返工四五十蚊食餐飯 閒閒地,更加體會到五蚊蘋果批九蚊包同廿一蚊餐係幾咁珍貴。

而故事主角黑椒漢堡,隔一年之後,居然食到感動流淚,唔單止保持水準,今年所謂珍寶版終於唔再只俾多塊扒你就算,而真係加多一層有三塊包四塊扒,如此盛 況好耐未見過,更顯珍寶版著數得多,因為普通版幾年前縮到只得一塊扒之後就再冇加返,而2014珍寶版加多六蚊就有多一塊包三塊扒你喎,抵食幾多呀大佬。亦因為 今年俾足料,冇返三層都配唔上呢個稱號之帝皇版終於再度君臨天下,可惜夾埋只得五塊扒,比2008年初代少一塊,但係份量依然比2012多一倍,價錢先至$38.6只貴多 六毫子,同上年三扒珍寶版咖哩漢堡一樣。簡直係反通漲價錢。

今年個黑椒漢堡,居然食到我有點童年時感覺,會覺得真係好食得黎抵食、食完慳左幾蚊好開心。假如麥記肯將黑椒漢堡列入常規餐牌再整埋做$9包 - 單扒普通版 都好丫 - 就可以取代亞視成為香港良心了。

2014年3月21日 星期五

[Kowloon Metal City: News] 已經十年,想聽tech-death的你別再等Necrophagist了,試試Alterbeast吧




http://alterbeast.bandcamp.com/album/immortal


還在默默等待德國傳奇級technical death metal樂隊Necrophagist十年也還未推出的新作嗎?專營tech-death的名廠牌Unique Leader了解你的愁緒,特意推介新晉樂隊Alterbeast給Necrophagist的fans們,登場作《Immortal》根本就與活在這個年代的Necrophagist會寫出的一模一樣。

可惜專輯欠了首bonus track,應該cover世嘉經典動作遊戲獸王記Altered Beast的主題曲。

Still waiting for the next release from the German technical death metal legends Necrophagist, even it has been a decade already? Introducing Alterbeast, the new star from world-famous tech-death specialist label Unique Label. Their debut "Immortal" sounds nothing indifferent from what Necrophagist would write now in this modern era.

If they need a bonus track for this or next album, the inevitable choice is a deathmetallization of the theme song of Sega classic arcade game Altered Beast.

2014年3月18日 星期二

[Kowloon Metal City: News] Arch Enemy的arch enemy,就是以後都不能再請男歌手




http://youtu.be/InRMwptcgAo


瑞典的Arch Enemy能成為最出色melodic death metal樂隊,除擁有無比出色的結他手,女主音Angela Gossow是毋用置疑的另一重大因素。十多年前她以其澎湃的聲線和狂野台風,顛覆了女性在重金屬的定位,並定下了普世對Arch Enemy的形象,怎料出乎全部人意料,就在推出新專輯前夕,樂隊宣佈女主音之位換了加拿大metalcore樂隊The Agonist的Alissa White-Gluz,最新MV已經由這新女主音出演了。

其實更想知道,十幾年後的Arch Enemy找回一個男歌手來唱,光景會是如何。只是礙於marketing,就算是男唱還是女唱根本無大分別的extreme metal樂隊,女歌手走了,新歌手都很難不找女性,尤其是像他們這麼知名的樂隊。

2014年3月13日 星期四

每週一相片大行動 2014 Week 11:就等我一次過祝晒兩位最愛女歌手,謝安琪同潘辰生日快樂




右邊謝安琪,唔使介紹啦,識劉Sir都知佢係香港五金業界謝安琪絕對忠心狂迷會永遠榮譽會長。左邊係潘辰,來自上海,我最鍾意中國歌手,賣點係磁性聲線。今 日先知道原來兩個都係同一日3/13生日,這就是緣份,就等我一次過祝晒兩位最愛女歌手生日快樂啦。

生日願望係,兩位都要快快出新碟,同埋開香港演唱會呀。



每週一相片大行動 2012 Week 42
推介一個我很喜愛的內地女歌手,潘辰。

[Kowloon Metal City: Video] 這就是神存在的證據




http://youtu.be/jN4KTO6S0tg


剛剛《全美一叮》有個十歲墨西哥小朋友高唱Frank Sinatra經典金曲《New York, New York》。不俗,但每次聽到這首歌,我都只會聯想到這個無人能敵的重唱版本。

為甚麼很多人都說,加拿大的Devin Townsend是個能將任何石點成金的重金屬界神級人馬?這就是證據。

Just took a glance at TV, saw a Mexican ten-year-old sang the Frank Sinatra classic "New York, New York". He's good, however whenever I hear this song, this unbeatable cover version immediately springs to mind.

You need proof that the Canadian prodigy Devin Townsend is truly Metal God in the Flesh? This is it.

2014年3月11日 星期二

因為天意,有地利,我都miss咗好多show

都俾人問過唔少次,而家九展隔籬返工,點解唔見我成日過九展過觀塘睇show?有啲嘢就整定嘅,由我做呢份工開始,99%機會九展或者HA有show嘅日子,我都會調咗去第二度返工or晏晝唔喺九龍灣放工。好似今晚HA兩隊band都係細楷t字頭又兩隊個名都唔識讀場show好有興趣,因為之前兩晚Suicide Silence & Caspian全部錯過晒,
難得呢半個月成日要坐尖沙咀就係今日有得走返九龍灣返工,諗住做嘢做到七點走人食完飯就有show睇,錯過咗兩場俾我執返個尾彩都好吖。點知五點幾先收到call,仲要係我屋企行兩個字到個場要人,老細話「益你啦!有得早收工,仲要阿公車錢送你返屋企!」點解偏偏就係今晚我想安安份份OT,你先至貼埋錢送到我返屋企呢?真係天意。而天意次次都係返工又撞著有show嘅日子先會出現。

又問,返咗屋企嗰邊,做完嘢都係六點幾嗟,點解唔搭回頭車出返去?即係呢,返到屋企呢,就唔一定代表已經放咗工嘅。TeamViewer實在是世上最邪惡發明之一...

2014年3月9日 星期日

終極版新瓶舊酒(不過還是好酒):《戰狼300:帝國崛起》

其實對《戰狼300:帝國崛起》冇咩期望,第一集係好睇嘅,不過純粹因為我睇戲最唔鍾意用腦一味打打殺殺就得,而且Zack Snyder太神全藍幕CG油畫式鏡頭加繼《Matrix》之後最造作慢動作打鬥通通破天荒,拍出嚟我覺得精彩過都幾平舖直敘嘅漫畫原版,當年我仲襯Megabox上IMAX巨幕版特登去睇多次添。但始終故事冇乜只叫足夠,打完殺完噴完血,覺得應該圓滿結束,估佢唔到隔咗七年可以拍一套續集出嚟,仲要唔差&同第一集一樣有興趣入戲院捧多次場添。

其實冇伏因為《帝國崛起》唔係續集而係外傳,兩個故事同步進行,加大量/太多畫外音畫出腸,就算冇睇過第一集都唔會唔知做乜。如果睇過第一集,仲會覺得「唔錯」一大原因係,頂,隔咗七年,拍法導法都係一樣,兩套都係大半套用CG整,都係畫面推爆黃色同藍色加超漫畫化構圖,都係好多假血(今集仲要更假,相信因為要整3D,所以99%血key得好明顯完全唔夾),都係以一敵百死守最後一關,都係由最後一戰演講做旁白帶到尾講晒成個故仔,都要搵首metal做非正式主題曲(上集Nine Inch Nails,今集Black Sabbath),同埋都要講返句"This is Sparta"。

但"This is Sparta"好大分別,上集講呢句最後係感嘆號,今集係感慨的句號,因為主角唔係斯巴達而係雅典,進而格局相同但又似乎好特登去將第一集橋段變成相反另一面拍出嚟,所以睇落有點平行宇宙feel:戰場由斯巴達變雅典,戰地由北變南,戰法由陸戰變海戰,男性主義變女性抬頭。講到好似終極版新瓶舊酒,事實的確明眼人都睇得出相當保守,完全係想複製一套《300》出嚟就算,可能因為今集Zack Snyder唔做導演退居監製,佢先《300》再《Watchmen》已經成為最有個人風格同最擅長將漫畫改編成電影導演(雖然都係翻拍同改編先掂,自己創作套《Sucker Punch》...),今集交俾人導,個新導演擺到明要學到足同一套,但又驚拍得唔夠Zack Snyder好就將所有嘢拍到更浮誇,慢動作更慢、變速變得更誇張、造作鏡頭更多更造作,不過過咗火仲影響埋故事速度,好似講神王、妖女同雅典王背景,有好多部份可以精簡唔使拖到而家咁長都算,直頭旁白講故事講足三個字會唔會過份得滯呀?講主角出身,直接剪到佢百步穿楊已經夠交代身份同神勇,唔使學上集見係主角就俾佢一個打十個,搞一大輪大龍鳳仲要啲慢鏡慢過doom metal,頭半個鐘其實好失敗,我都冇諗過一心入場為睇打戲睇斬到成街血,睇主角出場嗰幕可以睇到「屌,打夠未呀?」

好在之後越後越精彩控制得好,一來海戰上集未試過而且拍得出大場面,二來船戰點樣拍咁多慢動作呀咪踏實返唔浮誇順眼得多囉,但想搵返上集種霸氣可能會失望,今集主角外型完全及唔上Gerard Butler,而且雅典軍唔係斯巴達人欠缺戰士氣質,仲要海上打喎,換來係一份鬥謀略嘅比試步步為營,而唔係一味衝一味殺咁爽。打鬥風格都唔同咗,當主角冇一身肌肉,咪唔玩力量玩招式囉,明顯放咗好多心機去設計花巧招式,最後主角上船打成班Immortal再打妖女打成段拍得好型,只係妖女雙劍發揮太少喇,但應該冇乜人會投訴,始終重點唔係最後互斬,而係開戰之前兩個人互扑嘛,知唔知點解波斯同雅典到頭來都係要打仗?原來因為條友中出即飛。

或者本身冇乜期望同打戲好睇就夠,而家成套戲除咗個頭開得衰同導演造場面功力唔夠Zack Snyder之外,比我預期要好好多,個妖女演得實在太強,同埋口桀口桀口桀~反而有樣嘢想講。睇完好難明,咁激都只係2B級?其實要拍呢種史詩戰爭電影香港人唔係拍唔到,《赤壁》已經相當接近仲要全實景拍唔靠CG,不過如果《赤壁》用同一個拍法,即係一刀斬落去真係會斷頭斷手斷腳有血標出嚟,全套戲有幾幕女人除衫同一句半句粗口,仲要扑嘢扑到打功夫噉款,唔使我講你都知,呢套港產片一定唔會2B只可以三級上畫。就算你同老細講「拍到咁盛大場面咁激烈,外國會鍾意,一定賣到埠!」老細只會屌你「三級喎!香港大陸點賣呀?」然後再剪過,跟住一部戰場史詩變成純粹賣動作場面完全唔暴力唔寫實,就好似一句粗口都聽唔到嘅黑幫片一樣咁戇居。所以點解香港電影而家同以後都唔會出得到頭呢。

講深度就一定冇架喇,你要史詩得嚟點樣有意思睇返《賓墟》算啦,明珠台今晚就重播喇,而我呢挺膚淺市井之徒,就打算睇多一次仲要豪IMAX 3D版,為咗個妖女已經值得再睇啦!(呀...你知道唔係嗰種意思...)(between,嚟緊另一套Frank Miller漫畫改編電影《Sin City 2》都有佢份,即係又冇得唔入場啦)

2014年3月8日 星期六

豪華3:12:帝國崛起




如果唔係前晚上深圳返香港時走左班火車,我應該上畫正日已經睇左《戰狼300:帝國崛起》,而家留返今日睇禮拜六晏晝場,順路嗟今朝本身要返九展見客 - OT已經灰,九展呢個位見完客等開場出去食飯又唔係唔出去搵野食又唔係仲灰。無聊查查其他院有咩場,見到豪華好過癮講到明晏晝3:12開場,所以就算九展放工都想出豪華睇,唔係貪佢夠平(呢套戲去豪華睇其實浪費左),而係想見證一下,係咪真係唔三點二開唔三點三開,係要搭正12分至開場先?

其實最想睇果套係《金剛王》,即係見到個名、見到廣告已經覺得柒不可耐,跟住可以全九龍得影藝上一場早場、廢到連專播BCDE片的豪華都唔上,就證明呢套野挑戰得過。

2014年3月6日 星期四

2014年3月4日 星期二

作為真.香港人暨最後一代真正香港人,《香港將於33年後毀滅》不得不share




http://youtu.be/5YzCXjm2yOU


你都知劉Sir粗人一個,向來好少分享文藝嘢,但作為真.香港人暨最後一代真正香港人,《香港將於33年後毀滅》不得不share。

難怪質素會咁高,原來係《關公大戰外星人》同《喪屍血滴子》創作班底又一傑作。

2014年3月3日 星期一

多謝亞視夠廢

今晚第一晚開始重播《我和殭屍有個約會》就撞著奧斯卡,屋企部電視俾老母霸住,睇個勢九點半都冇得睇。好在亞視同超任博士一樣強項就係無限復活,十二點幾奧斯卡播完轉過去剛剛好到十二點半第一次重播。多謝亞視夠廢。

2014年3月2日 星期日

每週一相片大行動 2014 Week 10:《我和殭屍有個約會》三輯連環重播再x6,正宗睇到仆街





爽喎,歲月流聲台3/3開始,逢星期一至五晚重播《我和殭屍有個約會》,三輯連續播直播到八月,每集一日播足五次,都睇唔到或者唔夠喉唔緊要,星期日朝早八點半一次過播返晒五集你睇,每一集一個星期可以睇六次,三輯連環重播再x6,正宗睇到仆街。如此仆街,真係只有亞視先做得出。

突然之間希望亞視續到牌,唔會搞到睇一半就冇得追落去咁灰添。我成日覺得會選而家先開始馬拉松式重播,道理同每次大家屌無線收皮屌到真係有危機時,無記就會重播《天與地》or任何一套有黃子華份舊劇一樣。